التسميد الازوتي للقمح والكميات

 #زراعة القمح بالطريقة الصح

(( اللهم علمنا ما ينفعنا ونفعنا بما علمتنا وزدنا علمآ )) 🤲

👌هنتكلم اليوم عن التسميد الازوتي للقمح والكميات الي بيحتاجها الفدان من كل نوع ومواعيد إضافتها .

👌يحتاج الفدان الي ٧٠ وحدة ازوت في الأراضي القديمة و ٨٠ الي ٩٠ وحدة ازوت في الأراضي الحديثة دولا عبارة عن .

📍- من سماد اليوريا = ١٦٥ كجم يعني ثلاث شكاير وتلت.

📍- من سماد النترات =  ٢٠٠ كجم يعني اربع شكاير .

📍- من سماد سلفات النشادر = ٣٥٠ كجم يعني ٧ شكاير.

🌱1- الأراضي القديمة جيدة الصرف يفضل استخدام اليوريا وتعطي علي ثلاث جرعات او جرعتين .

📍- معا الزراعة شكارة ٥٠ كجم للفدان تسمي جرعة تنشطية لها أهمية كبيرة خاصة في الزراعات المتأخرة والأراضي الضعيفة .

📍- علي رية المحاياه بعد ٢٥ يوم من الزراعة اعطي شكارة وتلت او نص خليها عليك .

📍- الرية الثالثة الي بعد رية المحاياه الي بتكون علي عمر ٤٠ يوم او ٤٥ يوم اعطي شكارة وكده يبقى خلصنا .

🌿2- الأراضي الي بها نسبة ملوحة او بتروي بماء به نسبة أملاح سوا كانت قديمة او حديثة  استخدم نترات النشادر هي أفضل صور النيتروجين في هذه الأراضي  وتقسم الي

📍- شكارة معا الزراعة جرعة تنشطية.

📍- علي رية المحاياه اعطي شكارة ونص و الرية الي بعدها شكارة ونص .

📍- او اعطي جرعتين كل جرعة شكارتين علي رية المحاياه و الرية الي بعدها .

☘️3- الأراضي سيئة الصرف والي مش بتشرب مياه بتاعتها استخدم معاها سلفات النشادر وده افضل صنف سماد في هذه الأرض  تقسم الي .

📍- ٢شكارة جرعة تنشطية معا الزراعة.

📍- ٢.٥ شكارة معا رية المحاياه و  ٢.٥ شكارة معا الرية الي بعدها .

📍- او جرعتين في كل جرعة ٣.٥ شكارة معا رية المحاياه و الرية الي بعدها .

🍀4- طيب لو عندي اكثر من نوع حابب استخدامهم أعمل إيه ؟؟

📍- خلي اليوريا في الجرعة التنشطية افضل وأسرع .

📍- خلي النترات بعدها او السلفات معا مراعاة النسب كما ذكرت سابق .

🌳5- حضرتك بتقول وحدة ومش وحدة انا تخربط الكلام معايا قلي كل شكارة فيها كام وحدة او تتحسب ازي.؟؟

📍-شكارة اليوريا =  ٢٣ وحدة ازوت

📍- شكارة النترات = ١٧.٥ وحدة ازوت

📍- شكارة سلفات النشادر = ١٠.٢٥ وحدة ازوت .

🌴6- طيب لو نزلت عندي أمطار اقدر ابدر الكيماوي علي الأمطار و اعمل ايه ؟؟

📍- لو نزلت عندك أمطار وانت ما اضفتش الكيماوي بتاعك استني يومين ثلاثة و حط الكيماوي و جري المياه تجرية علي السريع ده في العمر الصغير .

📍- التسميد الكيماوي ينتهي بعد عمر ٥٠ يوم آخر جرعة تعطيها قبل ٥٠ يوم  .

📍- مفيش حاجة اسمها طالع بسبلة ولا بيلف ولا يدور اعطية الكمية المطلوبة في أول ٥٠ يوم من عمر النبات .

👌هنتكلم عن العناصر الصغري ودورها واهميتها لمحصول القمح في البوست القادم بإذن الله تعالى .

👌للعلم او الناس الي بتابع الصفحة قريب انا بكتب عشان اعرف الناس معلومة مش بياع ولا تأجر والصفحة دي صدقة جارية علي روح ابي الشيخ حمدي وعلي روحي كعلم ينتفع به لا عندي سوبر ولا عندي يوريا ولا نترات .

(( اللهم أجعل هذا العمل خالص لوجهك الكريم وأغفر لي ولوالدي وللمؤمنين والمؤمنات والمسلمين والمسلمات الاحياء منهم والاموات انك سميع قريب مجيب الدعوات )) 🤲

🙏تحياتي لكم أخوكم

م / علي حمدي النجمي