زراعة القمح

#زراعة القمح بالطريقة الصح 

(( اللهم علمنا ما ينفعنا ونفعنا بما علمتنا وزدنا علمآ )) 🤲

🌱1- كل الناس بتسأل ازى احصل على محصول كويس وإنتاج محترم  بأقل التكاليف ؟؟

📍- تجهيز الأرض كويس وحرث مرتين وتنعيم التربة و التسوية لو الأرض مش مستوية  .

📍- عندك سماد بلدي متحلل قديم مش من الزريبة علي الغيط علطول ضيف للفدان 20 م3 يعني ٥ مقطورة جرار لو عربية كروا يبقي عربية للقيراط .

📍- هتضيف ٣ شكارة للفدان سوبر فوسفات١٥٠ كجم يفضل محبب قبل الوش الآخير معا السماد البلدي  .

📍- تختار صنف مناسب للمطنقة بتاعتك خاصة أهلنا في وجه بحري بلاش جميزة ١١ او سدس ١٢ او مصر ١ او ايجاسيد .

📍- طريقة الزراعة بتفرق يا جماعة افضلهم المصاطب و بعدها العفير و آخرهم الحراتي .

📍- معدل التقاوي المضبوط والمحدد بلاش تشغل مخك في دي هضر مش هتفيد قالوا ٦٠ كجم يبقي ٦٠ كجم وده برضه بيرجع الصنف و طريقة الزراعة  .

📍- الموعد المحدد للزراعة والأفضل علي الاطلاق في كل الأصناف وكل المناطق من ١٥ /١١ حتي ١٥ / ١٢  بحري قبلي متزرعش قبل المعاد ده اتأخر احسن من تزرع قبل كده .

📍- لو أرضك تعبانه شوية وضعيفة أو زارع متأخر او معطتش سماد بلدي يبقي لازم تعطي شكارة يوريا او شكارة ونص نترات بعد الزراعة وقبل الري ده في العفير و المصاطب بتاع الحراتي ملهوش صالح بينا دي جرعة تنشطية .

📍- الأراضي الحديثة استخدم سلفات او نترات بلاش يوريا الجرعة هتكون شكارة ونص نترات او شكارتين سلفات . 

📍- رية المحاياه في الأراضي القديمة وطريقة الري بالغمر بعد ٢٠ - ٢٥ يوم  مش أكتر من كده .

📍- الأراضي الحديثة حسب طبيعية التربة و طريقة الري .

📍- حصل عندك مطرة تكفي رية يعني الأرض شبعت تمام مشبعتش تعطي اول جرعة كيماوي وتمشي المياه علي الحامي كده .

👌اول ثلاث اسابيع من عمر المحصول مش محتاج منك كتر من كده .

👌الزراعة علي مصاطب مش هتتعبك لا في تسميد ولا حصاد المصطبة عرضها ١٢٠ سم اجدع حصادة تمشي عليها .

👌انا شايف الناس بتدور على الساهل مش علي الصح يعني زرعت و المحصول زي الفل وفر تقاوي و مياه معاك  كسلان تحصد يبقي قليل عليك الفقر .

👌الناس الي هتزرع غلة قديمة لازم تغربلها كويس و تجيب مبيد فطري وتعامل البذور  .

تجهيز الارض

🌱1- ازي أعمل مصطبة وكام عرضها و ازي اسمد الازوت بتاعي و ازي احصد المحصول ؟؟

📍- عمل المصطبة بنفس الخطط بتاع الجرار كانك هتزرع ذرة بس هتشيل السلاح الي في النص بدل ما ثلاث أسلحة هيبقي اثنين .

📍- عرض المصطبه متر او متر وعشرين سم النبات هيشرب متلقش مينفعش المياه تطلع علي ظهر المصطبة.

📍- التسميد تكبيش بين الجور زي تسميد الذرة كمان التسميد عندي دفعتين بس علي رية المحاياه و الرية الي بعدها عمر ٢٠ يوم و عمر ٤٠ يوم  .

📍- احصد ازي المصاطب بالحصادة تقدر تحصد بآلة الي في الكتف او الثانية الي بتزق ده لو حصيد آلي طبعاً الحصيد اليدوي وده افضلهم .

📍- كلامي موجة الي الفلاح البسيط الي بيزرع نص فدان تلت فدان او ربع  في الوقت ده مش محتاج حصيد آلي لو هو  واولادة في يومين هيضم الغيط لو الي زارع نص ولا ربع مش قادر يحصدة يبقي خسارة يتقال عليه مزارع .

📍- العاملة مكلفة و هنجيب منين انفار يا مؤمن الانفار في كل مكان محصول القمح لا بيحتاج عزيق و بياخد تكلفة والعامل الاجري ده يأكل منين خلي العامل يحصد قيراطين في اليوم ب ١٠٠ جنية لو ربنا كرم القيراطين يعطوا ١.٥ اردب متوسط او ٢ اردب ب ٢٠٠٠ جنية مش كتير ولا تكلفة .

📍- ربنا بيعطي كل شخص رزقة ورزق الي هيشتغل معاه لو الغيط ذاد اردب يغطي الليلة دي كلها .

📍- الأراضي المستصلحة الحديثة مينفعش فيه المصاطب غير في حالة الري بالتنقيط .

🌿2- ينفع ازرع علي خطوط زي الذرة الشامية الزراعة هتكون علي الجانبين ولا جنب واحد ؟؟

📍- الزراعة علي خطوط تفيد في الأراضي الرملية والي بها نسبة ملوحة .

📍- الجورة تكون في نصف الخط وتزرع علي الجانبين في الأراضي الرملية والي بها نسبة ملوحة الأرض الطينية ازرع رجل غراب علي الجانبين و فوق الخط . 

📍- تنفع في الأرض الي صرفها مش كويس .

📍- تنفع معا الي مش عارف يعمل مصاطب او خايف منها .

📍- الري يكون في الخطوط بس المياه متطلعش ظهر الخط و التسميد عادي تكبيش او نثر .

☘️3- ينفع أزرع الغلة بعدين أعمل مصاطب او أخطط و ينفع ازرع المصاطب غفير بدار بدل ما اشك بالقدوم و التعب ده ؟؟

📍- مينفعش ازرع وبعدين أعمل مصاطب الغلة هتدفن ونسبة الانبات هتكون ضعيفة .

📍- الأفضل انك تعمل مصاطب وبعدين تشك الغلة بالقدوم او بالبلانتر .

📍- ينفع تزرع عفير علي المصطبة بس تخف ايدك في الرش القيراط ياخد ٢ كجم تقاوي في الحالة دي ولازم تغطي البذور بالشوكة تغطية خفيفة .

🍀4- هو لازم الجرعة التنشطية دي هندسة و هتفرق لو معطتها  بتكون كميتها قدر إيه و تنفع معا الطريقة الحراتي ولا لا ؟؟

📍- لو عارف انه أرضك ضعيفة و كانت مزروعة قبل كده محصول نجيلي ذرة او رز يبقي ضروري .

📍- لو معطتش سماد بلدي معا الحرث يبقي ضروري .

📍- لو زارع متأخر عن المعاد المحدد يبقي ضروري .

📍- لو أرضك كويسة و عطيت سماد بلدي و زارع في معادك مش ضروري .

📍- بتكون ١ شكارة يوريا او شكارة ونص نترات واحد منهم للفدان .

📍- بتكون بعد الزراعة وقبل الري مباشرة .

📍- متنفعش معا الطريقة الحراتي او التخضيري .

(( اللهم علمنا ما ينفعنا ونفعنا بما علمتنا وزدنا علمآ )) 🤲

الزراعة

🌱1- الي محطش سوبر فوسفات معا الزراعة عشان غالي او عشان هيزرع علي مصاطب الذرة امتي اعطي سوبر و فيه حاجة تسد مكانة ؟؟ 

📍- يفضل ان تحرث الأرض و تعطي ١٠٠ كجم للفدان قبل الوش الأخير او قبل التخطيط او المصاطب .

📍- تقدر تعطي ٨ لتر حمض فوسفورك للفدان معا مياه الري في رية المحاياه و ٦ لتر حمض فوسفورك في الري الي بعدها  هيكون اوفر ليك وأفضل لنبات .

📍- مينفعش ترش السوبر بعد الانبات كده علي وش الأرض تكلفة و النبات مش هيستفيد منه  .

📍- حمض الفوسفوريك ٨ لتر في برميل علي مدخل الغيط  أثناء الري كويس جدا جدا لتفريغ .

📍- طيب حطيت سوبر وعاوز كمان تحط حمض فوسفورك خير وبركة هيبقي المعدل ٦ لتر للفدان معا رية المحاياه بس  .

📍- ينفع ترش عالي فوسفور و بوتاسيوم مرتين على عمر ٢٥ يوم بعد رية المحاياه و كمان بعد الري الي بعدها .

📍- معدل ١ لتر / الفدان  كده يبقي سديت عن الفوسفور و البوتاسيوم  وكمان معاه عناصر صغري تبقى ٣ عصفير ب رشة واحدة .

📍- بستغرب الناس الي مش حابة تحرث الأرض و خايفة على المصاطب وكأنها مسلح خايفة تهدها القمح كريم ويحب الكرامة تعطية تاخد منه  .

🌿2- فيه ناس مش مقتنعة بالمصاطب و حابة تعملها وفيه ناس بتسأل عن طريقة عملها و فوائدها ؟؟

📍- انا بشرح وبفصل والي يناسبك استخدمة نافع معاك حراتي خير وبركة نافع معاك عفير تمام علي خطوط تمام برضه .

📍- مينفعش ازرع بالسطارة وارجع أعمل مصاطب جزء كبير من الغلة هيدفن مش هينبت  .

📍- عرض المصطبه متر او متر ٢٠ سم او حتي ٨٠ سم تمشي .

📍- تقدر تزرع علي خطوط زي الذرة الشامية .

📍- تقدر تستخدم البلانتر اليدوي في زراعة المصاطب او الخطوط او حتي العفير العادي .

☘️3- فيه ناس متخوفة من الحصاد الآلي علي المصاطب خاصة أصحاب المساحات الكبيرة  و الأراضي الحديثة؟؟

📍- الأراضي الحديثة الأفضل ليها عفير بدار الي في حالة الري بالتنقيط تنفع المصاطب فيها .

📍- تقدر تحصد بآلة الكتف الحديثة او بالآخر الي تزق الي شبه العزاقة عرضها مناسب معا المصطبة .

📍- كلامي في المصاطب والخطوط اقصد بيه الفلاح الي بيزرع نص فدان ولا تلت فدان هو الي محتاج المساعدة و ١٠ كجم إنتاج تفرق معاه .

🍀4- لحد الآن الناس محتارة بين الأصناف حتي الي أشتري غلة بيدور ويسأل وكأنه اول مره يزرع ؟؟

📍- الأصناف كلها شبة بعض الاختلاف بيكون بسيط المزارع الجدع والأرض الكويسة كل الأصناف فيها كويسة .

📍- الست الجدعة تخبز بتاو القيضي يطلع فايش و تلاقي واحدة خايبة وتقلك القمح ده مش كويس وعرقة مش زين  😂 .

📍- نظافة الغلة و لون الدقيق و نسبة النخالة بتتوقف علي عوامل كتير منها الصنف و نظافة الحصاد والدراسة نفسها بتفرق و درجة النضج بتفرق .

📍- مفيش صنف كامل متكامل بس فيه مزارع جدع وافهم و مزارع لا  .

(( اللهم أجعل هذا العمل خالص لوجهك الكريم وأغفر لي ولوالدي وللمؤمنين والمؤمنات والمسلمين والمسلمات الاحياء منهم والاموات انك سميع قريب مجيب الدعوات )) 🤲

🙏تحياتي لكم اخوكم

م / علي حمدي النجمي